வலி கிழக்கு தவிசாளர் சட்டத்தை மீறாது செயற்பட வேண்டும் – கட்டளை!

வலிகாமம் கிழக்கு பிரதேச சபைத் தவிசாளர் தியாகராஜா நிரோஷ் புலிகளை நினைவு கூர்ந்து மாவீரர் தின பொதுக் கூட்டத்தினை ஏற்பாடு செய்துவருகின்றார் என புலனாய்வுத்துறையினருக்கு தகவல் கிடைத்திருப்பதாக தெரிவித்து பொலிஸாரினால்; ‘பி அறிக்கையின்’ பிரகாரம் தாக்கல் செய்யப்பட்ட வழக்கில், பயங்கரவாதத்தடைச்சட்டம் மற்றும் அதனோடு இணைந்த வர்த்தமானி அறிவத்தல்கள், கொரோனா சுகாதார ஏற்பாடுகளை மீறாதவகையில் செயற்பட வேண்டும் என மல்லாகம் நீதிவான் நீதிமன்றம் இன்று (23) மதியம் உத்தரவு பிறப்பித்தது.

இவ் வழக்கில் தவிசாளருக்கு எதிராக, தடை செய்யப்பட்ட பயங்கரவாத அமைப்பான தமிழீழ விடுதலைப் புலிகளை நினைவு கூர்ந்து மாவீரர் நாளில் பொதுக்கூட்டம் ஒன்றினை தவிசாளர் ஏற்பாடு செய்வதாக புலனாய்வுத்துறையின் தகவல் தமக்குக் கிடைத்துள்ளதாக பொலிஸ் தரப்பில் இருந்து மன்றில் பி அறிக்கை சமர்ப்பிக்கப்பட்டது.

வழக்கில் சட்டத்தரணி வி.திருக்குமரன் தலைமையில் சட்டத்தரணிகள் ஆஜராகினர். சட்டத்தரணிகள் இன்று வரையில் தவிசாளர் அப்படியொரு பொதுக்கூட்டத்தினையும் ஏற்பாடுசெய்யவில்லை எனவாதிட்டனர். அதேவேளை ஏதாவது ஒரு கூட்டத்தினை ஏற்பாடு செய்வதாயின் சட்டதிற்கு உட்பட்டு சுகாதார அனுமதிகளுடனேயே மேற்கெற்கொள்ளப்படும் எனவும் மன்றில் உத்தரவாதமளிக்கப்பட்டது.

இந்த இடத்தில் பொலிஸாரினால் பி அறிக்கை தாக்கல் செய்யப்பட்ட நிலையில், பொலிஸாரின் குற்றச்சாட்டுக்கள் மறுக்கப்பட்டுள்ளது. பொலிஸாரும் குற்றச்சாட்டுக்களுக்கான ஆதாரங்களை முன்வைக்கவில்லை என்பதை நீதிபதி தெரிவித்ததுடன்; முன்வைக்கப்பட்ட குற்றச்சாட்டுக்களின் பிரகாரம் வலிகாமம் கிழக்கு பிரதேச சபையின் தவிசாளர் பயங்கரவாதம் தொடர்பான வர்த்தமானி அறிவித்தல், தனிமைப்படுத்தல் சட்டங்களை மீறி செயற்பட்டால் நீதிமன்றின் உத்தரவைப் பெறாமலேயே கைது செய்ய பொலிஸாருக்கு முடியும் எனவும் பயங்கரவாதத் தடைச்சட்டம் மற்றும் வர்த்தமானி அறிவித்தல்கள், கொரோனா தொடர்பான சட்ட ஏற்பாடுகளையும் கடைப்பிடிக்க வேண்டும் எனவும் அடுத்த தவணையில் குற்றச்சாட்டப்பட்டவரின் செயற்பாடு பற்றி பொலிஸாரினால் அறிக்கை சமர்ப்பிக்கவும் கட்டளை பிறப்பிக்கப்பட்டது.

இதேவேளை வலிகாமம் கிழக்கு பிரதேச சபைத்தவிசாளருக்கு எதிராக குற்றவியல் நடைமுறைச் சட்டக்கோவையின் பிரிவு 106(1) இன் கீழ் தடை உத்தரவு ஒன்றினைப் பெற்றுக்கொள்வது தொடர்பில் நாளை (24) தாக்கல் யாழ்ப்பாணம் நீதிவான் நீதிமன்றில் வழக்கொன்று தாக்கல் செய்யப்பட்டுள்ளமையும் குறிப்பிடத்தக்கது.